Një ditë para atentatit ku mbeti i plagosur Thimjo Rubati, djali i tij me precedentë, Andrea Rubati, është përfshirë në një tjetër ngjarje. 27-vjeçari është në kërkim për dhunë ndaj efektivit të policisë, së bashku me dy shokë të tij.
Andrea Rubati, 27-vjec, Antonio Lefteri, 30 vjeç dhe Engjëll Dalanaj, 30 vjeç, dyshohet se kanë goditur dhe kanosur me thikë oficerin e Policisë Mihal Velço, mbrëmjen e së enjtes në lagjen nr. 4 të Sarandës.
Nga hetimet mësohet se Mihal Velço, me detyre oficer në Komisariatin e Policisë Sarandë u prezantua si punonjës policie dhe u kërkoi tre të rinjve të mos kryenin manovra të rrezikshme me motor në qytet. Dyshohet se ata e kanë fyer, goditur për shkak të detyrës dhe kanosur me thikë.
Pas ngjarjes, tre të dyshuarit që kanë dhe precedentë të mëparshem penalë, janë larguar me motor nga vendngjarja. Policia bën të ditur se jane identifikuar nga kamerat e sigurisë në zonë, pasi oficeri nuk i ka njohur.
Rubati, Lefteri dhe Dalanaj janë shpallur në kërkim dhe akuzohen për veprat penale "Goditja për shkak të detyrës" dhe "Kanosja". Policia ka ushtruar kontrolle në banesa dhe ambiente të tjera, por ende s’ka rënë në gjurmët e tyre.
