Tre shtetas shqiptarë janë arrestuar gjatë një operacioni të gjerë policor në rrugën Spreedorfer Straße, pranë kufirit me Çekinë, në qytetin Ebersbach të Gjermanisë. Sipas policisë, efektivët bastisën një ish-ndërtesë kompanie, ku vunë në pranga tre burra të moshës 30, 38 dhe 49 vjeç.
Sipas raportimeve të mediave të huaja, gjatë kontrollit, autoritetet sekuestruan sasi të mëdha kimikatesh të dyshimta, si dhe pajisje që dyshohet se do të përdoreshin për ngritjen e një plantacioni kanabisi. Zëdhënësi i policisë, Stefan Heiduck, bëri të ditur se hetimet paraprake tregojnë se të arrestuarit po përgatiteshin të kultivonin lëndë narkotike.
Operacioni policor, i cili nisi në mesnatë, vijon ende. Në aksion janë angazhuar gjithashtu forcat e zjarrfikësve dhe Agjencia Federale për Ndihmë Teknike (THW), ndërsa hetimet për zbardhjen e plotë të rastit janë në vazhdim.
