Një grabitje spektakolare ka goditur Muzeun Lalique në Wingen-sur-Moder, në verilindje të Francës. Bizhuteri luksoze me vlerë disa milionë euro janë vjedhur. Sipas një burimi të cituar nga AFP, autorët kanë hyrë me forcë në muze rreth orës 05:30 të mëngjesit të së dielës dhe janë drejtuar menjëherë në sallën ku ekspozoheshin bizhuteritë.
Nga muzeu janë marrë rreth 20 bizhuteri, ndërsa dëmi paraprak vlerësohet deri në 4 milionë euro. Hetuesit vijojnë të përcaktojnë vlerën e saktë të objekteve të vjedhura. Pas grabitjes, drejtuesit e muzeut njoftuan se institucioni do të qëndrojë i mbyllur për disa ditë. Sipas autoriteteve, sistemi i alarmit u aktivizua, por përpara mbërritjes së ekipit të sigurisë, një punonjës pastrimi ishte i pari që konstatoi vjedhjen dhe njoftoi policinë.
Policia franceze ka nisur hetimet dhe po analizon pamjet e kamerave të sigurisë për të identifikuar autorët. Muzeu Lalique, i hapur në vitin 2011 pranë fabrikës historike të kompanisë, i kushtohet krijimtarisë së René Lalique, një prej emrave më të njohur të stilit Art Nouveau dhe Art Deco. Ngjarja ndodh pak kohë pas grabitjes së bujshme në Muzeun e Luvrit, duke rikthyer në vëmendje shqetësimet për sigurinë e muzeve në Francë.
