Të paktën nëntë persona kanë humbur jetën dhe dhjetëra të tjerë janë plagosur pas një sulmi rus me raketa balistike dhe dronë ndaj Kievit në orët e para të së hënës. Sipas autoriteteve ukrainase, sulmi goditi disa zona të kryeqytetit, duke dëmtuar ndërtesa banimi dhe duke bllokuar banorë në apartamentet e tyre. Ekipet e shpëtimit evakuuan dhjetëra qytetarë, përfshirë fëmijë. Shumë automjete u përfshinë nga flakët.
Pak orë para sulmit, presidenti ukrainas Volodymyr Zelensky kishte paralajmëruar se Rusia po përgatiste një tjetër ofensivë masive.Ai deklaroi se Moska shpesh intensifikon sulmet përpara ngjarjeve të rëndësishme ndërkombëtare.
Sulmi vjen në prag të samitit të NATO-s, ku lufta në Ukrainë pritet të jetë një nga temat kryesore të diskutimit. Në këtë kuadër, presidenti amerikan Donald Trump ka zhvilluar ditët e fundit biseda telefonike me presidentin rus Vladimir Putin dhe presidentin ukrainas Volodymyr Zelensky, në përpjekje për të nxitur një zgjidhje të konfliktit.
