Një ish-zyrtar i lartë i qeverisë amerikane është arrestuar në SHBA, pasi agjentët e FBI-së gjetën qindra shufra ari me vlerë më shumë se 40 milionë dollarë në shtëpinë e tij në Virxhinia.
Sipas dokumenteve të gjykatës, David Rush kishte bërë kërkesa të përsëritura në qeverinë amerikane për të marrë sasi të mëdha ari dhe valute të huaj për "shpenzime zyrtare". Ai është akuzuar për përvetësim të fondeve publike.
Sipas “New York Times”, Rush mbajti deri vonë një pozicion të lartë në CIA. Ai u arrestua dhe mbetet në paraburgim deri në një seancë dëgjimore të planifikuar për këtë javë, ndërsa avokati i tij nuk pranoi të komentojë mbi rastin.
Gjatë kontrollit të shtëpisë së tij, agjentët federalë gjetën gjithashtu rreth 2 milionë dollarë në para të gatshme, si dhe 35 orë luksoze, sipas BBC.
Dokumentet e gjykatës pohojnë gjithashtu se Rush kishte qasje në informacione tepër sekrete dhe ishte i autorizuar të trajtonte materiale të klasifikuara.
Ai akuzohet gjithashtu për raportim të rremë të arsimit dhe shërbimit të tij ushtarak kur aplikonte për punë qeveritare, si dhe për marrjen e paligjshme të lejes ushtarake për mijëra dollarë kompensim.
Sipas dokumenteve të çështjes, Rush punoi si drejtues i lartë në një agjenci qeveritare të Virxhinias. FBI njoftoi se arrestimi u bë më 19 maj pas një referimi nga vetë CIA.
Sipas dokumenteve të gjykatës, midis nëntorit 2025 dhe marsit 2026, Rush i bëri vazhdimisht kërkesa qeverisë amerikane për të marrë "sasi të konsiderueshme valutash të huaja dhe dhjetëra miliona dollarë në lingota ari" për qëllime biznesi, të cilat ai përfundimisht i mori.
Gjatë një hetimi të brendshëm, thuhet se CIA nuk arriti të gjente as shufrat e arit dhe as sasitë e mëdha të valutës së huaj që i ishin dhënë Russ-it. Autoritetet thanë gjithashtu se nuk u gjetën të dhëna zyrtare që shpjegonin se çfarë ndodhi me paratë dhe arin që ai kishte marrë për përdorim zyrtar.
FBI-ja përfundimisht lëshoi një urdhër kontrolli për shtëpinë e tij në Virxhinia më 18 maj. Gjatë operacionit, agjentët sekuestruan afërsisht 303 shufra ari, secila me peshë rreth një kilogram. Bazuar në çmimet e arit të sotëm, vlera e tyre totale vlerësohet të jetë më shumë se 40 milionë dollarë. Dokumentet e gjykatës nuk specifikojnë pse Rush i mbajti arin dhe paratë e gatshme në shtëpinë e tij. ©LAPSI.al
