Tajon Buchanan është shumë afër transferimit te Inter, por fjalët e legjendës së Bruges, Gert Verheyen, nuk i bëjnë tifozët zikaltër të flenë të qetë. “Buchanan është një talent, me disa probleme (qesh) dhe me një karakter të çuditshëm, të paktën në fushën e lojës - deklaroi ai në një intervistë për TuttoSport -. Duhet të bëhet edhe më tepër me vazhdimësi. Këtu ai tregoi një nivel të lartë për një apo dy ndeshje, pastaj dështonte në ndeshjen e mëpasme. E kështu me radhë: pak mirë dhe pak keq. Ai kurrë nuk mbajti një nivel të lartë konstant për 5 ose 6 muaj". Për krahasimin me Ivan Perisic, i cili gjithashtu u largua nga kampionati belge: "Perisiç ishte më i fortë, më i kompletuar. Sigurisht, nuk mund ta dimë pas dy ose tre vjetësh se sa mund të përmirësohet Buchanan. Por nëse tifozët e Inter presin një lojtar si Perisic, e kanë shumë gabim dhe do të zhgënjehen”.
NUK ËSHTË MBROJTËS NATYRAL
Fjalët që dalin nga goja e Verheyen, kampionit historik të Bruges dhe golashënuesit të dytë të të gjitha kohërave të skuadrës belge, nuk janë aspak qetësuese. "Kur mbërriti te Bruges, ai ishte anësori klasik, djathtas ose majtas, lojtar driblues, i aftë për të dhënë më shumë asiste. Pastaj rrethanat e bënë të luante si mbrojtës i djathtë - shtoi ai -. Për mua ai nuk është një lojtar mbrojtës dhe kjo është arsyeja pse ai nuk mund ta luajë atë rol. Ai mund të luajë aty në një ekip dominues, ku nuk duhet të mbrojë shumë".
SKEMA MUND TA NDIHMOJË
3-5-2 i Inzaghit mund të maskojë boshllëqet në mbrojtje. "Është ndoshta një pozicion më i mirë për të dhe për mënyrën e tij të lojës. Nëse shikojmë statistikat, ato nuk janë shumë të shkëlqyera (në 20 paraqitje këtë sezon ai shënoi 3 gola dhe dha 4 asiste në 20 ndeshje, red.). Ai është një lojtar që bie në sy, shumë i shpejtë, dinamik”.
PROBLEME KARAKTERI
Verheyen nuk është aspak i butë me Buchanan. "Mendo vetëm që këtu ai nuk është njeriu më i rëndësishëm në ekip. E njëjta gjë vlen edhe për kombëtaren e tij, Kanadanë. Ai humbet në diskutime të kota me arbitrat. Ai proteston, debaton me kundërshtarët e zemërohet nëse pëson shumë faulle. Më duket pothuajse sikur ka humbur aftësinë për të shijuar lojën. Ai shumë shpesh ka një fytyrë të zemëruar".
Buchanan luajti 20 ndeshje për Bruges këtë sezon, me tre gola dhe katër asiste. Megjithatë, javët e fundit ai ka përfunduar i mënjanuar, edhe për shkak të negociatave me Inter dhe synimit të qartë për të mos rinovuar kontratën që skadon në vitin 2025.
