Ndeshja e parë nuk jep garanci për nivel performace. Ndërsa 1-1 i maturuar në 90 minutat kundër Dinamo Batumit, nuk jep siguri në këndvështrim rezultati. E megjithatë, Tirana beson se mund tia dalë në transfertën e Batumit. Synimi është të arrijë në takimin me Besiktas, në raundin e dytë të Conference League. Fillimisht duhet një fitore në Batumi, kundër një Dinamo që nuk u duk e papërballueshme në ndeshjen e parë. Shehi në këtë pikë duhet të manovrojë me njerëzit që ka e formën që kanë.
Bardheblutë me dëmtimet nuk kanë problem. Ajo që shqetëson teknikun Orges Shehi është forma e disa titullarëve të tij, sidomos nga ata që janë bashkuar me kryeqytetasit në fillim të verës. Erion Hoxhallari, Gledi Mici, por edhe Albi Doka nuk do të jenë në maksimumin e tyre përpara nisjes së kampionatit në fund të gushtit. Në këtë pikë, te Tirana situata ndërlikohet. Shehi nuk mund të përdorë Lulajn e Najdovskin bashkë, duke qenë se janë të dy djathtoshë. Kështu, që Hoxhallari duhet të shtrëngojë dhëmbët edhe njëherë për të përballuar një kundërshtar në mes të kampionatit.
Lexo më tej: Në Mezokozvezd, dita e të vërtetës për Partizanin: Zekic “imiton” formacionin e Tiranës
DILEMAT E TEKNIKUT
Dilema e madhe e teknikut të bardhebluve është Përgjoni apo Mici. Djaloshi i ri ka ritëm e intensitet, por nuk ka eksperiencën e ish-mbrojtësit të Kukësit. Në mesfushë Lushkja, autori i golit të barazimit në shtesë kundër gjoergjianve, duket se ka rifituar vendin në skuadër. Në repart, i vetmi i paprekshëm është Hila. Përpara është rikthyer të punojë me grupin Kaina Nunes. Megjithatë, braziliani nuk ka formën fizike për të shqetësuar asnjë nga tridhëmbëshi titullar i ndeshjes së parë Latifi-Hasani-Abazaj. Deri para nisjes të mërkurën në mëngjes, Shehi do të ketë përcaktuar edhe detajet e fundit të formacionit të tij. Gjithnjë nëse dëmtimet nuk i luajnë ndonjë rreng të papritur.
