Një ndeshje për tu fituar, kundër një kundërshtari më të kuotuar, në një fushë asnjëanëse. Partizani, pas 1-1 në Tiranë, duhet të tentojë fitoren në transfertën e Mezokozvezd të Hungarisë, ku mbërriti pasditen e djeshme. Kthimi kundër bjellorusëve të BATE Borisov, e vlefshme për turin e parë të Champions League do të luhet në 20.00. Tekniku Zoran Zekic i ka idetë e qarta dhe pothuaj nuk ka asnjë dilemë që t’i shqetësojë mendimet mbi formacionin.
NË MES EDHE STUHIA E SHIUT
Në orën 19:30 skuadra zbarkoi për stërvitjen në fushën e stadiumit, menjëherë pasi një stuhi shiu goditi qytetit verior të Hungarisë. Reshjet e furishme madje rrezikuan seancë e rifiniturës së kryeqytetasve. Gjithsesi, moti u përmirësua dhe seanca e djeshme u krye pa problem. Tendenca e Zekic ishte të mbante skuadrën në ritmin e duhur fizik. Kroati i kishte zgjidhur çështjet taktike në stadiumin e Kamzës, i përzgjedhur pikërisht për shkak të terrenit me bar natyral, në funksion të ndeshjes me BATE Borisov.
Lexo më tej: Video/ Shtylla shpëton BATE Borisov, vetëm barazim për Partizanin: Cara i përgjigjet Antilevskit
FORMACIONI
Zekiç nuk ka ndërmend të bëjë lëvizje në formacion në këtë përballje të dytë. Kroati do të imitojë seleksionin e ndeshjes së parë në Tiranë, duke parë se skuadra u përgjigj mire. Kështu, formacioni duhet të jetë i njëjti. Përpara Qirkos, që ripropozohet në portë, do të jenë Hadroji dhe Atanaskoski në krahë, ndërsa Sembene e Sota do të mbrojnë qendrën. Mehmeti bindi në mesfushë dhe duhet të jetë sërish në treshen e mesfushës së bashku me Rrapajn dhe Muratajn. Nga ana tjetër, as sulmi nuk do të ndryshojë. Cara, Mba dhe Da Silva me shumë mundësi do të përbëjnë ofensivën e të kuqve.
Portier: Qirko
Mbrojtës: Hadroji, Sota, Sembene, Atanaskoski
Mesfushorë: Rrapaj, Mehmeti, Murataj
Sulmues: Cara, Mba, Da Silva
