Organizata Botërore e Shëndetësisë tha se numri i rasteve me COVID-19 të regjistruara në mbarë botën u rrit me 11% javën e kaluar krahasuar me një javë më herët, duke shënuar rritjen më të madhe në kontinentin amerikan. Kjo erdhi pas një rritjeje graduale që nga tetori.
Agjencia shëndetësore e OKB-së tha në raportin e saj javor epidemiologjik të publikuar të martën vonë se kishte rreth 4,9 milionë raste të raportuara rishtazi në mbarë botën në periudhën 20 - 26 dhjetor.
Evropa përbënte më shumë se gjysmën e totalit, me 2,8 milionë, megjithëse kjo qe një rritje prej vetëm 3% krahasuar me javën e kaluar. Ajo gjithashtu kishte shkallën më të lartë të infeksionit nga çdo rajon, me 304,6 raste të reja për 100,000 banorë.
OBSH tha se rastet e reja në Amerikë u rritën me 39% në afro 1,48 milionë dhe rajoni kishte shkallën e dytë më të lartë të infeksionit me 144,4 raste të reja për 100,000 banorë. Vetëm SHBA-ja pa më shumë se 1,18 milionë raste, një rritje prej 34%.
Rastet e reja të raportuara në Afrikë u rritën me 7% në gati 275,000.
Agjencia tha se “rreziku i përgjithshëm në lidhje me variantin e ri … Omicron mbetet shumë i lartë”. Ajo citoi "prova të qëndrueshme" se ka një avantazh në rritje ndaj variantit Delta, i cili mbetet dominues në pjesë të botës.
