Ndonëse nuk ekziston zyrtarisht në fjalorin e gjuhës shqipe, fjala “patronazhist” është bërë tashmë pjesë e bisedave të përditshme në këto ditë të fundit të fushatës së zgjedhjeve të 25 prillit.
Shkak u bë botimi i lapsi.al i databazës që përdor Partia Socialiste me të dhënat e 910 mijë qytetarëve të Tiranës. Por fjalën “patronazhist” e ka përmendur Vangjush Dako që në vitin 2019 duke treguar madje edhe detyrën që ka pasur në zgjedhje Astrit Avdyli, një nga personat e arrestuar si pjesë e “Dosjes 339”.
Në një intervistë në 7 qershor të vitit 2019, kur doli në përgjime me Avdylin për blerje votash, Dako thoshte se pikërisht ky person punonte për selinë rozë edhe më shumë se një militant partie.
“Patronazhimi apo censusi që i themi ne është detyrë e Partisë Socialiste dhe çdo organizatë e saj. Merr listën dhe i çmonton, ky është refugjat, ky me pikëpyetje, ky voton për këtë e për atë.
Ai është vetëfutur dhe po punon për fushatën e Partisë Socialiste, po punon si një militant i thjeshtë, në Shijak dhe në shumë qytete të vogla, kjo është forma. Njerëz që ty nuk ta merr mendja, marrin taksinë, makinën, hipin qytetarët dhe i sjellin tek qendrat e votimit. Punojnë më shumë se një militant i Partisë” – deklaronte Dako në atë kohë.
Astrit Avdyli konsiderohej si një nga “kokat” e grupit të Shijakut i cili u arrestua në 21 tetor 2018. Në përgjimet e publikuara nga Bild ai dëgjohet që bën pazare dhe presione për votat. ©LAPSI.al
