Ish-deputeti i PDIU-së Aqif Rakipi është përfshirë në një aksident rrugor mbrëmjen e së hënës. Panorama.al raportoi se makina me të cilën ai udhëtonte është përplasur me një automjet pranë stadiumit Air Albania në qendër të Tiranës. Madje makina e tij ka përfunduar në një dyqan aty pranë.
Policia reagoi me një njoftim ku thuhet se “rreth orës 19:25, në afërsi të stadiumit "Air Albania" shtetasi B. Xh., ka humbur kontrollin e mjetit dhe është përplasur me një mjet të parkuar aty në afërsi. Nga përplasja ka vetëm dëme materiale.
Shërbimi i Qarkullimit Rrugor ka kryer veprimet përkatëse dhe ka ndëshkuar administrativisht për mosrregullim shpejtësie në qendrat e banuara drejtuesin e mjetit shtetasin B. Xh”. Në njoftim nuk përmendet fare emri i ish-deputetit.
Ky është aksidenti i dytë që përfshihet Rakipi.
Në gusht të 2017-ës ai aksidentoi për vdekje një person në autostradën Tiranë-Durrës. Një 54 vjeç, banues në Kashar u përplas për vdekje, por ish-deputeti doli i pafajshëm për shkak se sipas policisë ka pasur fushëpamje të kufizuar dhe viktima i kishte prerë rrugën.
Aqif Rakipi nuk kandidon në këto zgjedhje, por djali i tij është kandidat në listën e PS-së. ©LAPSI.al
