“Ora News” zbardh detaje të reja nga dhunimi në polici i 29-vjeçarit shqiptaro-amerikan Erald Alimehmeti.
I riu është dhunuar nga 5 punonjës policie, pasditen e 3 nëntorit 2020 në ambjentet e komisariatit nr.2 në Tiranë, të cilët e kanë futur në një dhomë pa kamera ku edhe e kanë dhunuar.
Pas dhunimit, Erald Alimehmeti në orën 11:00 të datës 4 nëntor 2020 është transportuar nga vetë punonjësit e policisë së komisariatit nr.2 në drejtim të Spitalit Ushtarak, me qëllim dhënies e ndihmës mjekësore pasi 29-vjeçari nuk është ndjerë mirë.
Ai ka patur marrje mendsh, të vjella dhe gjëndje të fikti, ndaj dhe është çuar me urgjencë në spital.
“OraNews”, mëson se mjekët e spitalit kanë hapur kartelë shtrimi për Erald Alimehmetin, duke e ekzaminuar këtë të fundit me skaner në pjesën e kokës ku kishte dëmtime dhe në pjesën e gjoksit.
Pas këtyre ekzaminimeve, mjekët e kanë trajtuar Alimehmetin me disa medikamente dhe më pas 29-vjeçari është marrë sërish nga policia, pavarësisht se mjekët kanë kërkuar që ai të qëndronte i shtruar në spital.
I gjithë dokumentacioni spitalor dhe kartela e shtrimit të të riut tashmë është sekuestruar nga oficerët e Shërbimit të Çështjeve të Brendshme dhe Ankesave dhe rasti po trajtohet me shumë seriozitet.
Ndërkohë oficerët i kanë marrë dëshminë dhe të dëmtuarit Erald Alimehmeti, i cili u shoqërua në polici për mosvendosje maske dhe më pas u dhunua barbarisht, me argumentin se ka kundërshtuar me forcë punonjësit e policisë./ ora news
