Eksperti i shëndetit publik Erion Dasho ka bërë hedhur dyshime të forta mbi shifrat e covid në Shqipëri në një analizë të publikuar në faqen e tij në Facebook. Ai thotë se 3-mujori i tretë i vitit 2020, pra muajt korrik – gusht – shtator kanë shënuar “një rritje të pakuptimte të vdekjeve” në vendin tonë.
“Një krahasim i vdekshmërisë gjatë vitit 2020 me atë të viteve paraardhëse tregon qartë se "diçka" ka ndodhur tremujorin e tretë të vitit 2020. Në një situatë pothuajse të stabilizuar të vdekshmërisë në vite dhe në një grafik pothuajse uniform, papritur ka një "kërcim" në tremujorin e tretë të vitit 2020” – thotë Dasho që vëren se në këtë përiudhë ka pasur një rritje me 1300 raste vdeshjesh më shumë se mesatarja e 3 viteve të shkuara.
“Kjo rritje prej gati 1,300 raste nga mesatarja e 3 viteve të shkuara nuk mund të shpjegohet me rastësinë. Dhe duke qenë se nuk kemi aktualisht ndonjë "epidemi" infarkti apo aksidentesh, indicet janë se pjesa më e madhe e 1,300 vdekjeve ekstra lidhen me COVID-19”.
Çështja është se në këto 3 muaj janë raportuar vetëm 322 vdekje nga covid-19, por Dasho hedh dyshime se kjo shifër mund të jetë edhe më e lartë.
“E sigurt është se nuk janë 322 vdekje aq sa tregon propaganda qeveritare, por shumë më tepër se kaq. Vdekshmëria nga COVID-19 nuk është 208 për 1 milion, por vlerësohet të paktën 2 ose 3 herë më e lartë se kaq!
Shqipëria nuk është vendi me vdekshmërinë më të ulët nga COVID-i në rajon, por ka gjasa të jetë një nga vendet me vdekshmërinë më të lartë nga COVID-i në botë! COVID-19 nuk shërohet me propagandë por me masa të efektshme, të bazuara mbi evidenca!” – thotë Dasho që apelon se duhet vepruar menjëherë për të frenuar pandeminë. ©LAPSI.al
[caption id="" align="alignnone" width="530"]
Grafik i publikuar nga Erion Dasho[/caption]
