Në një takim të hapur me pensionistët në Tiranë, kryetari i Partisë Demokratike Lulzim Basha ka thënë se kjo kategori është lënë në harresë nga qeveria Rama. Kryedemokrati Basha ka bërë sërish thirrje që kryeministri të marrë parasysh planin me 5 pika që ka shpallur PD-ja, në të cilin parashikohet edhe një bonus prej 20 mijë lekësh për çdo pensionist për të mbuluar shpenzimet e maskave dhe dezinfenktantëve. Basha tha se gjatë gjithë kësaj periudhe pandemie, qeveria e Facebook-ut dhe Instagram-it ka dhënë miliona euro ne koncesionet korruptive për inceneratorët e plehrave, teksa ka lënë pa asnjë lloj mbështetjeje pensionistët dhe qytetarët e thjeshtë të këtij vendi.
Sipas kreut të Pd-së shteti duhet të marrë urgjentisht masa pasi me këto ritme nuk do të ketë më kapacitet në spitale për tu përballur me shpërthimin e pandemisë. Sipas Bashës e gjithë vemendja dhe buxheti i shtetit duhet të përqendrohet te ndihma e njerëzve që po vuajnë prekjen nga Covid-19.
