Në ditën Kombëtare të trashëgimisë kulturore çështja e shembjes së teatrit kombëtar është vënë në fokus të diskutimeve edhe në arenën politike. Kryeministri Edi Rama është rikthyer te ngjarja e shembjes së teatrit, që shkaktoi përplasje të forta mes artistëve dhe policisë. Gjatë fjalës së tij, kreu i qeverisë shqiptare nuk kurseu ironinë duke thënë se ata ende “vajtojnë atë ngrehinë”.
“Vajtojnë akoma për atë ngrehinë të Teatrit Kombëtar, duke e përdorur si argument për të sulmuar ‘talebanët’ që janë në qeveri. Deri dje nuk vunë dorë në asnjë monument kulture dhe nuk prekën asnjë metër katror pëlhurë për ta pastruar nga gjithë shtresa e pluhurit që kishte rënë mbi gjithë këtë thesar kudo. Nëse do marrim të shohim listën e ndërhyrjeve në këto 7 vite në monumente kulture, është e gjatë. Ky program me BE që startojmë sot është xhevahiri më i çmuar i kurorës së punës që kemi bërë sot.”, tha kryeministri.
