Kreu i PD-së, Lulzim Basha komenton refuzimin që kryeministri Edi Rama i bëri planit të opozitës për zgjidhjen e krizës. Sipas Bashës, refuzimi erdhi nga “eurforia e tij për moshapjen e negociatave”.
“Ajo që pamë ishte një njeri euforik nga mos-hapja e negociatave. Hapja e negociatave është kërcënim për çdo autokrat, për çdo drejtues të korruptuar. Mos harroni se Sanaderi, ish-kryeministri i Kroacisë, shkoi në burg për një orë dore me anë së cilës gjetën aferën korruptive të shitjes së armëve.
Këtu ka me qindra tregues që dalin ditë për ditë. I fundit doli para 2 ditëve nga SHBA, që do të çonin në ndjekje penale atë që sapo pamë (Ramën) duke bërë kllounin para Kuvendit” – tha Basha.
“Duket që nuk njeh rekomandimet, s’i ka lexuar. E gjithë është pjesë e shfaqjes prandaj flet si “lac”. Mund të gënjejë opozitën farsë, por jo ndërkombëtarët dhe shqiptarët" - tha ai.
Sa i përket deklaratës së kryeministrit Rama se është i gatshëm të shkojë edhe në selinë e PD-së, Basha u shpreh se askush nuk e ka ftuar.
“Po kush e ka ftuar? Pse duhet të vijë? Kë po e djeg malli për të? Është përgjegjësi i krizës. Me kë do vijë? Me Tomën? Me Dakon? Me Avdylajt? Nuk mund të lajë zhulin e fajit me një foto të re me kryetarin e opozitës”, - deklaroi Lulzim Basha në një intervistë për TV Syri. ©LAPSI.al
