Duket se kjo e sotmja do të jetë një ditë e mbushur me takime politike. Sinjalin e dha vetë Kreu i Shteti, Ilir Meta që shkoi në zyrën e tij që në 05:00 të mëngjesit për t’i qëndruar korrekt orarit të përcaktuar në ftesën për Ramën, pavarësisht se ky i fundit e refuzoi.
Kreu i Partisë Demokratike, Lulzim Basha, pas takimit në mëngjesin e sotëm me presidentin e Republikës, Ilir Meta, i është drejtuar selisë blu ku pritet të mbledhë rreth mesditës kreun e Partisë për Drejtësi Integrim dhe Unitet (PDIU), Shpëtim Idrizi dhe aleatët e tij: Agron Dukën Partisë Agrare Ambientaliste (PAA), Vangjel Dulen e Partisë Bashkimi për të Drejtat e Njeriut (PBDNJ)-së, Dashamir Shehun e Lëvizjes për Zhvillim Kombëtar (LZHK), Nard Ndokën e Partisë Demokristiane (PDK) dhe Fatmir Mediun e Partisë Republikane (PR).
Gjithashtu, mësohet se kryedemokrati do të takojë në orën 12:30 kryetaren e Lëvizjes Socialiste për Integrim (LSI), Monika Kryemadhi.
