Paulo Dybala është objektivi i madh i Bayern Mynich për sezonin e ardhshëm. Gjermanët - që ndërkohë kanë siguruar dy përforcime të rëndësishme si Pavard (35 milionë) e Lucas Hernandez (80 milionë) - janë gati të vendosin qershinë mbi tortë për një kapërcim në kualitet. Juventus vlerëson Joya rreth 100 milionë euro: shifër e paarritshme për shumë klube, por jo për bavarezët, që prej një viti janë në gjurmët e argjentinasit.
Pas katër sezoneve me bardhezinjtë e shtatë vitesh në Itali, Dybala mund të largohet nga Serie A në verë. Një hipotezë gjithnjë e më e mundshme me kalimin e javëve, edhe pse raportet me Allegri në kohët e fundit nuk kanë qenë aq të bukur dhe argjentinasi nuk ndjen më besimin e plotë të teknikut, që të shtunën në konferencë për shtyp foli për projektin e ri: "Kam në mendje Juventusi e ri prej gjashtë muajsh - ishin fjalët e Allegri -. Nuk mund tiu them cili është. Më parë duhet të flas me presidentin e të shoh nëse jemi dakord, pastaj duhen menduar gjërat teknike". E tek "gjërat teknike", mund të përfshihet edhe Joya, i lënë jashtë skuadre shumë shpesh këtë vit për shkak të një kondicioni jo gjithnjë optimal.
Dybala është emri i nxehtë edhe në tratativën e mundshme me Inter për të arritur tek Icardi, që me shumë mundësi do të largohet nga zikaltrit në përfundim të sezonit. Vetëm se Dybala është i joshur nga një aventurë jashtë Italisë dhe këtu bavarezët po tentojnë ti ofrojnë numrit 10 një rol protagonisti në skuadrën e tyre të riformatuar.
