Kryetari i partisë "Bindja Demokratike", pas kërkesës së partisë Bashkimi Demokrat Shqiptar (PBDSH) për ta ç'regjistruar nga zgjedhjet, ka reaguar, duke e cilësuar forcën politike në fjalë një parti fantazëm.
Sipas Patozit, kreu i PD-së, Lulzim Basha është angazhuar që të pengojë Bindjen Demokratike të marrë pjesë në zgjedhje. Më tej ai ka shtuar se përdorimi i shantazhit përmes klubeve me maska, për të penguar në zgjedhje pjesëmarrjen e partisë që ai përfaqëson, nuk do të funksionojë.
"Lulëzim Basha është angazhuar seriozisht në betejën kundër BINDJES DEMOKRATIKE, tanimë duke u përpjekur ta pengojë atë që të marrë pjesë në zgjedhje.
Ndërkohë që për të gjithë demokratët shqiptarë kundërshtar mbetet Edi Rama dhe qeveria e tij, për Lulzim Bashën kundërshtar është BINDJA DEMOKRATIKE, pasi, me sa duket, atë e shikon si rrezik për karriken e tij.
Përdorimi i disa klubeve me maska për të shantazhuar BINDJEN DEMOKRATIKE, që ajo të shmanget nga gara, do të dështojnë ashtu siç dështoi edhe fushata qesharake e gjetjes së nënshkrimeve të parregullta, të cilat u mblodhën në një kohë rekord.
BINDJA DEMOKRATIKE vazhdon t’i qëndrojë vendimit të saj për të garuar në çdo bashki të vendit, përveç atyre ku mund të rikandidojnë bashkiakë të djathtë në detyrë ose kandidatë të pavarur.
Ajo është në një aleancë të gjerë me demokratët shqiptarë në gjithë vendin, përveç Lulzim Bashës, i cili ndjehet më i kërcënuar nga BINDJA, se sa nga Edi Rama", shkruan Patozi në rrjetet sociale.
