Ka arritur në 18 numri i qytetarëve të shoqëruar nga Policia e Elbasanit pas tentativës për të penguar kalimin e ekskortës së kryeministrit Edi Rama.
Sipas informacioneve paraprake të bëra të ditura nga burimet në radhët e Policisë, mes 18 personave që do të procedohen për prishje të rendit publik, bën pjesë edhe ish-deputeti i Partisë Demokratike, Luçiano Boçi.
Mesditën e sotme në sheshin “Gensher”, Rama zhvilloi një takim të radhës me elektoratin socialist nën lajtmotivin “Bashkia që duam”, duke i paraprirë fushatës për zgjedhjet vendore të 30 qershorit. Mirëpo, kreu i qeverisë u prit nga një grumbull protestuesish elbasanas, të cilët qëlluan me gurë në drejtim të ekskortës së tij shoqëruese, në përpjekje për ta ndalur.
Shkak i aktit të tyre ishte kërkesa për llogaridhënie të Ramës mbi premtimet e pambajtura.
