Valbona Ndreu është nëna që mëngjesin e 8 korrikut kishte dalë me dy vogëlushet e saj, por që fatkeqësisht njërën prej tyre nuk e ka më.
E shqetësuar për shëndetin e vajzave pasi ishin me temperaturë, ajo u nis drejt spitalit, por një makinë i përplasi duke i marrë jetën Esmeraldës vetëm 7-vjeçare dhe plagosur motrën e saj dhe nënën.
Ajo nga shtrati i spitalit tregon se ende nuk i besohet se e vogla e saj nuk jeton më, ndërsa nuk i mban lotët. E veshur me të zeza dhe me zërin që i dridhet Valbona, nuk ia heq dorën të voglës së saj, që qëndron në shtratin ngjitur.
“Atë ditë unë kam qenë me vajzat te spitali. Besoj që e kam parë rrugën dhe kam ndal në trafik ndarësen. Në momentin që po shikoja për të kaluar rrugën kam pas dy vajzat përdore. Nuk di asgjë! E di që kam pas si një tërmet nga mbrapa edhe më pas nuk di asgjë… Akoma s’më besohet. Që ta marrësh përdore, e ta heqësh nga duart nuk më besohet. I mbaja gjithmonë përdore, akoma s’më besohet që se kam njërën vajzë” – tregon mes lotësh Valbona për GSh.
