Në një takim të radhës me koordinatorët kryeministri Rama vuri në dukje sërish rëndësinë e funksionimit të platformës së bashkëqeverisjes si dhe bëri thirrje për shfrytëzimin nga qytetarët. Kreu i qeverisë tha se misioni parësor i platformës është çrrënjosja e mendësisë së vjetër të administratës duke i dhënë vëmendje dhe zgjidhje të menjëhershme problemeve të qytetarëve.
"Titullari më i lartë, pra ministri apo ministrja, vihet menjëherë në dispozicion të qytetarit. Në tre minuta të realizohet lidhja që njerëzit tradicionalisht e kanë kërkuar dhe vazhdojnë ta kërkojnë përmes mikut të njohurit, kushëririt apo më keq akoma përmes rryshfetit."
Rama e quajti reformën në administratë një armë kundër traditës penguese në sjelljen e administratës, duke shmangur vështirësitë.
Kryeministri garantoi qe platforma mundëson nisjen e hetimeve administrateve, largimin nga puna ose edhe ndjekjen penale të personave të cilët janë konstatuar se janë kthyer në pengesë.
