Një ditë para protestës së lajmëruar të opozitës, ministri Fatmir Xhafaj ka sfiduar kryetarin e PD Lulzim Basha në lidhje me audiopërgjimin ku pretendohet se është i vëllai i tij Agron Xhafaj.
Përmes një postimi në twitter, Fatmir Xhafaj thotë se nëse audio përgjimi i bërë publik nga PD, do të rezultojë i vërtetë, do të marrë çdo përgjegjësi morale, politike e ligjore, përfshi dhe largimin nga funksioni i Ministrit të Brendshëm, por nëse nuk është i vërtetë, Basha duhet të dorëhiqet.
“E vërteta është vetëm një, dhe vetëm një në këtë rast. Ai që nuk është në anën e të vërtetës, duhet të përgjigjet. Këtë e kërkon interesi i ligjshëm i qytetarëve. #Drejtësiderinëfund
Nëse provohet e kundërta, atëherë duhet që Lulëzim Basha të dorëhiqet dhe të përballet me ligjin. Pyeteni: A është ai i gatshëm për këtë sfidë?
Bashkëqytetarëve të thirrur në protestë, u them sot: Nëse audio përgjimi i bërë publik nga PD, do të rezultojë i vërtetë, unë do të marr çdo përgjegjësi morale, politike e ligjore, përfshi dhe largimin nga funksioni i Ministrit të Brendshëm. Jam i gatshëm ta bëj këtë pa hezitim”, shkruan Xhafaj.
