Partia Demokratike e akuzon ministrin e Brendshëm, Fatmir Xhafaj vetëm për falsifikim të ndryshimeve ligjore, në mënyrë që ai të favorizonte vëllain e dënuar për trafik droge, Agron Xhafaj. Por sot PD i ‘përplasi’ Xhafajt edhe Ligjin Antimafia, sipas së cilit ministri duhet të mbajë përgjegjësi.
“Neni 3 e thotë qartë se dispozitat e Ligjit Antimafia zbatohen edhe ndaj pasurive të personave, në pronësi ose të zotëruara në mënyrë të tërthortë nga personat e afërm (bashkëshorti, fëmijët, vëllezërit, motrat, bashkëjetuesi), për të cilët prezumohet regjistrimi i rremë, përveçse kur provohet e kundërta. Shqipëria është i vetmi vend në botë ku Ministri i Brendshëm, përgjegjës për zbatimin e Ligjit Antimafia, është vetë subjekt i Ligjit Antimafia,” tha PD.
Sot gjithashtu u raportua se Prokuroria e Krimeve të Rënda është vënë në lëvizje për të verifikuar rastin e Fatmir Xhafajt dhe vëllait të tij. Nuk dihet se çfarë do të rezultojë në fund të këtij procesi, ndërsa ndërkombëtarët, të cilët sipas Ramës e kanë në anglisht dosjen prej PD-së, nuk janë shprehur ende për këtë rast. Nga ana tjetër ka shumë spekulime që thonë se kryeministri tashmë e ka ‘lëshuar’ ministrin e tij të Brendshëm. Mbetet të presim! Zhvillime do të ketë edhe pas vizitës së Ramës të martën në Paris, ku do të takohet me presidentin Macron.
©LAPSI.al
