Kryetarja e LSI-së, Monika Kryemadhi nuk beson se Saimir Tahiri mund të arrestohet tani që është njeri i lirë.
“Kush do ta arrestojë? Prokurorë që kanë probleme me veten e tyre me të shkuarën dhe atë që përfaqësojnë”,- shprehu ajo skepticizmin e saj.
E ftuar në emisionin “Kjo Javë” Kryemadhi tha se nëse kjo ndodh, ai do hapë librin e shënimeve dhe do nxjerrë gjithë urdhëruesit.
“Tahiri do hapte librin e shënimeve, do nxirrte të gjitha urdhëresat. “Rilindja” ka përgjegjësinë, por Edi Rama është përgjegjësi si për kanabizimin, rritjen e borxhit, rritjen e taksave, koncesioneve”,- shtoi ajo.
Kryemadhi u shpreh e bindur se shkarkimi i kreut të Prokurorisë së Krimeve të Rënda, Besim Hajdarmataj ishte pjesë e lojës së Edi Ramës për të shpëtuar Saimir Tahirin.
Ajo shkoi më tej dhe akuzoi zëvendësuesen e Hajdarmatajt, Donika Prelën, mike të kryeprokurores Arta Marku, siç u shpreh Kryemadhi, se ishte një nga personat që kishte dijeni për vjedhjen e postës sekrete të Prokurorisë së Durrësit.
