Një bari 45-vjeçar me origjinë nga Sardenja dhe me banim në Arezzo është autori i dyshuar i vrasjes së një shqiptari 22-vjeçar mbrëmë në Sinalunga, provinca e Sienas.
Krimi ndodhi mbrëmë, rreth orës dhjetë, gjatë ndeshjes finale të Kupës së Italisë midis Juventusit e Milanit, kur bariu hyri në banesën e një familjeje shqiptare dhe shtiu një herë drejt 22-vjeçarit, duke e goditur në qafë. Ai vdiq pak çaste më pas.
Pas vrasjes, bariu u largua në këmbë, por rreth një kilometër larg vendit të krimit ra në një gropë ku theu këmbën. Edhe pse vazhdoi përpjekjet për t’u larguar, vrasësi u vu re nga karabinierët, të cilët e arrestuan dhe e dërguan në spital për mjekim, në pritje të masës së arrestit që do t’i komunikohet nesër.
Karabinierët kanë gjetur armën e krimit, ndërkohë që ende nuk dihet motivi i vrasjes, ndonëse duket si një larje hesapesh.
