Rajmonda Smoqi, nënë e dy fëmijëve, ka braktisur shtëpinë e saj dy katëshe të mbuluar nga uji i lumit Erzen, në Shijak. Me zërin që i dridhet dhe me pikëllim të madh, gruaja tregon sesi e braktisi shtëpinë para se uji të hynte në banesë.
Në banesën dy katëshe ka qëndruar vetëm bashkëshorti i saj, ndërsa e gjithë lagjja është pa drita e pa ujë të pijshëm. Këtë verë kishte rregulluar shtëpinë pas përmbytjes së fillim vitit nga lumi.
Gruaja kërkon që shtrati i lumit të thellohet, që ngjarje si kjo, që sipas saj janë të përsëritura, të mos ndodhin më.
Dy ditë më parë nga prurjet e lumit Erzen, tre ura në Shijak janë shembur duke bllokuar tri fshatra, Gjepalaj, Çizmel dhe Shetel. Qarkullimi është i pamundur duke izoluar banorët e fshatrave. Ndërsa probleme ka edhe në Ballias, pasi janë bllokuar rrugët. Deri tani raportohet se janë përmbytur 50 banesa, 40 familje janë evakuuar, nga shtëpitë e tyre të përmbytura.
