Asgjë në llogarinë e saj në Instagram nuk duket e pazakontë. Por, megjithatë profili që ajo iu prezantua botës është “fallco”.
Louise Delage duket si një vajzë e pashme franceze që e shijon jetën, duke pirë koktejle, duke ngrënë në restorante luksoze apo duke shijuar shampanjë teksa ndodhet në vaskë.
Aq e pashme në fakt, sa 25-vjeçarja parisiene arriti të kishte mbi 50 mijë ndjekës që kurse e hapi llogarinë e saj e saj në Instagram më 1 gusht.
Si shumë yje në Instagram, edhe ajo kishte admiruesit e saj, që i bënin vazhdimisht komplimente.
Por, më 30 shtator Delage postoi në llogarinë e saj një video të fundit ku përmblidheshin të gjitha postimet e bëra që nga fillimi, duke zbuluar një detaj që i lidh të gjitha; në secilën nga 149 fotot e postuara, ajo mbante një pije alkoolike në dorë.
Llogaria e Delage në fakt nuk ishte ashtu siç dukej, dhe madje as ajo nuk ishte ‘e vërtetë’.
“Louise Delage” është në fakt një studente franceze që pozonte në kuadër të një fushate për ‘Addict Aide’, një organizate që ndihmon njerëzit të qëndrojnë esëll dhe është realizuar nga një agjenci reklamash në Paris, BETC. Emri i vajzës është sekret, sipas presidentit te BETC, Stéphane Xiberras.
“Asnjë nga ndjekësit në Instagram nuk e kuptoi se adresa ishte e rreme, por të gjithë besuan se kjo vajzë kishte gjithçka në jetë”, thotë ai.
