Mungesa e Albano Bogdos në finalen e show-t të humorit, duket se u përjetua me shqetësim nga shikuesit e Apartamentit 2XL. Ishte fillimisht kolegu i tij Julian Deda që sqaroi se për shkak të sëmundjes, Albano Bogdo nuk mundi të ishte në program. Dhe tashmë, është vetë aktori i cili ka treguar për Opinion arsyen e “zhdukjes” nga ekrani. “Kisha disa ditë që po kaloja një sëmundje dhe përpara shfaqjes fola me Turin dhe me Julin dhe ramë dakort që të dilja në shfaqje. Mirëpo aq rezistova, nuk kisha më energji, dhe u detyrova ta lija në mes.” – rrëfen Albano.
I pyetur për mundësinë e ndonjë oferte, për të braktisur Vizion Plus dhe emisionin i cili e bëri të famshëm, aktori Bogdo tregon: “Ofertat më kanë munguar, sepse është e kotë ti bësh ofertë dikujt që nuk ikën. Këtë e dinë të gjithë, unë nuk iki. Për vetë faktin që mendoj se është formati që më përshtatet më shumë, plus marrëdhëniet që kam me drejtuesit, kolegët, me njerëzit që na ndjekin, etj. S’besoj se mund ta gjej diku tjetër atë frymë. Ne jemi si familje.” – përfundon ai.
