Olsa Toqi, kompozitorja e këngës fituese të festivalit të fundit në RTSh, ka shërbyer sot në rolin e anëtares së komisionit të votimit në referendumin e thirrur nga Partia Socialiste. Muzikantja, emri i së cilës nuk ishte dëgjuar më herët, deri përpara triumfit të këngës "Përrallë" kënduar nga Eneda Tarifa, u pa këtë 9 prill në qendrën nr 9 të votimit, e ngritur në ambientet e selisë Rozë.
Në fakt kjo nuk është hera e parë që artistët shqiptarë përfshihen si komisionerë në zgjedhje. Por këtë rradhë, thirrja e partisë për t'i qëndruar pranë, duket se e mposhti obligimin e Olsës - autore e këngës përfaqësuese të Shqipërisë në Eurovision. Në vend që kompozitorja të shoqëronte këngëtaren Eneda Tarifa në turneun promovues që po zhvillon momentalisht në Europë, ajo u ul në tavolinën e numërimit të votave.
