Për të disatën herë, edhe këtë të hënë, banorët e fshatit Zvezdë në bashkinë e Maliqit janë ngritur në protestë për ujin e pijshëm.
Sipas tyre, pavarësisht se së fundmi është bërë një investim për ujësjellësin e ri të fshatit, me vlerë më shumë se 600 mijë euro, ende në çezmat e tyre nuk ka një pikë ujë.
Banorët kërkojnë që dikush të mbajë përgjegjësi, ndërsa theksojnë se gjatë viteve të demokracisë nuk kanë arritur të kenë ujë të pijshëm në banesat e tyre, duke përdorur vetëm burimet e fshatit.
“Gjithë fshati Zvezdë ka dalë për një mashtrim me ujin e pijshëm, u vodhën 600 milion lekë, ky është uji. Vjen kryetari vetëm për dy foto. Ujësjellësi ishte 7 muaj afat, u bë një vit e ca, para një muaji u përfundua. Nuk ka ujë. Këtu nis gjëja nga mbrapa.”
“Kalojnë ato të bagëtive. Pihet ai ujë? Atë ujë do na japin akoma? Ujërat e zeza me lekët tona. Ku ka ujë të pijshëm? Këta duan të mashtrojnë. Gjithë fshati pa ujë, aty do investim, nuk do tallje.”
“Kemi një çezmë të rrjedhshme. Po të vish në orën 3 të mëngjesit, marrin gratë karrocat me bidona dhe po t’i shohësh edhe rrihen gratë. Dalim edhe ne burrat, po ç’të bëjmë? Jemi zënë e rrahur, nuk kemi muhabet me njëri-tjetrin, përse? Për ujë. Ka 35 vjet që paguajmë taksa, vajti 55, ku vajtën taksat tona?”
“Ne e dimë si ia bëjmë. Me investimet tona, me burimet e fshatit. Në çdo vend të shposh në Zvezdë ka ujë, por nuk duan të investojnë. Groposen lekët në dhe. U tallën me lekët tona. Nuk paska ujë tani”, thonë disa prej banorëve.
Në fshatin Zvezdë jetojnë mbi 1500 banorë, të cilët vuajnë mungesën e ujit të pijshëm ndërsa drejtues të Ujësjellës Kanalizimeve Korçë shprehen se projekti është ende në zhvillim dhe nuk ka përfunduar. Ata sigurojnë se me përfundimin e punimeve, fshati do të ketë furnizim me ujë të pijshëm.
