Protesta antiqeveritare ka hyrë në ditën e saj të 57-të, ndërsa protestuesit kanë nisur marshimin nga sheshi “Skënderbej” drejt Kryeministrisë.
Prej gati dy muajsh, qytetarë të ardhur nga qytete të ndryshme të vendit, por edhe nga diaspora, janë mbledhur çdo ditë në Tiranë, duke kërkuar ndryshime të thella politike dhe duke denoncuar problematika që, sipas tyre, prekin jetën sociale, ekonomike dhe institucionale të vendit.
Edhe këtë të mërkurë, pas grumbullimit në sheshin “Skënderbej”, protestuesit nisën marshimin përgjatë bulevardit “Dëshmorët e Kombit”, ndërsa gjatë tubimit janë dëgjuar thirrje si: “Rama, jep dorëheqjen!”, “Rama në burg, Berisha në burg!” dhe “Shqipëria nuk është në shitje!”.
Sipas organizatorëve të Revolucionit Flamingo, protesta e kësaj dite do të përsërisë kërkesën për dorëheqjen e menjëhershme të kryeministrit Edi Rama dhe të qeverisë, si edhe thirrjen drejtuar SPAK-ut për të hetuar Ramën dhe ish-zëvendëskryeministren Belinda Balluku për afera të pretenduara korruptive.
Pas ndalesës përpara godinës së Kryeministrisë, ku do të mbahen fjalime dhe do të artikulohen qëndrimet e protestuesve për zhvillimet politike në vend, marshimi pritet të vijojë në disa nga rrugët kryesore të Tiranës.
Organizatorët kanë bërë thirrje që protesta të zhvillohet në mënyrë paqësore, duke theksuar se synimi i saj është të ushtrojë presion qytetar përmes mjeteve demokratike.
