Një valë e re e të nxehtit ekstrem ka përfshirë pjesën më të madhe të Evropës, me temperaturat që pritet të arrijnë deri në 45°C në disa zona gjatë kësaj jave. Italia ka shpallur sërish alarm të kuq për disa qytete, mes tyre Firence, Torino dhe Peruxhia. Nga e mërkura listës do t’i shtohen edhe Roma dhe Bolonja. Në shumë rajone temperaturat do të luhaten mes 39 dhe 41°C. Përveç vapës përvëluese, vendi po përballet edhe me thatësirë dhe mungesë të ujit. Në Firence korrierët e shpërndarjes së ushqimit kanë paralajmëruar grevë, duke kërkuar më shumë mbrojtje gjatë orëve me temperatura ekstreme.
Vala e të nxehtit po godet edhe pjesën tjetër të Evropës. Në Britani temperaturat e larta kanë shtuar rrezikun e zjarreve. Në Francë flakët kanë përfshirë pyllin Fontainebleau, ndërsa në Gjermani autoritetet raportojnë 99 viktima nga mbytjet vetëm gjatë muajit qershor.
