Tensionet mes SHBA-së dhe Iranit po përshkallëzohen sërish. Të dielën në mbrëmje, Uashingtoni ndërmori një valë të re sulmesh ajrore ndaj objektivave ushtarake iraniane. Sipas mediave shtetërore iraniane, sulmet lanë një person të vrarë në jugperëndim të Iranit dhe katër të tjerë të plagosur.
Komanda Qendrore e Ushtrisë amerikane (CENTCOM) bëri të ditur se në shënjestër ishin sistemet e mbrojtjes ajrore, radarët bregdetarë, si dhe kapacitetet raketore dhe të dronëve të Iranit. Përgjigjja e Teheranit erdhi brenda pak orësh. Garda Revolucionare Islamike (IRGC) njoftoi se kishte goditur baza ushtarake amerikane në Kuvajt, Jordani dhe Bahrein.
Përshkallëzimi i ri hedh hije të forta dyshimi mbi të ardhmen e marrëveshjes së përkohshme SHBA–Iran, të nënshkruar në qershor. Ndërkohë, palët vijojnë të japin versione të kundërta për Ngushticën e Hormuzit. Irani këmbëngul se e ka mbyllur korridorin strategjik detar deri në një njoftim të dytë, ndërsa SHBA deklaron se trafiku detar mbetet i hapur.
