Ushtria amerikane ka vijuar për natën e gjashtë radhazi sulmet ajrore ndaj Iranit, duke goditur objekte ushtarake dhe infrastrukturë strategjike në disa rajone të vendit. Sipas CENTCOM, në shënjestër ishin sistemet e mbrojtjes ajrore, radarët bregdetarë, bazat logjistike dhe kapacitetet detare iraniane. Ndërkohë, mediat shtetërore iraniane raportuan se bombardimet prekën edhe ura, një aeroport, një stacion treni dhe zona civile.
Televizioni shtetëror IRIB bëri të ditur se shtatë persona humbën jetën në rajonin Bandar Hamir. Sulme u raportuan edhe në Bandar Abbas dhe Bushehr, ku ndodhet centrali i vetëm bërthamor funksional i Iranit.
Teherani paralajmëroi se do të kundërpërgjigjet nëse SHBA vazhdon të godasë infrastrukturën iraniane. Një zëdhënës ushtarak deklaroi se, në këtë rast, "e gjithë infrastruktura në rajonin e Gjirit do të jetë objektiv legjitim". Gjatë natës, Kuvajti, Katari dhe Bahreini raportuan alarme dhe sulme ajrore. Sipas mediave iraniane, dronët e Teheranit goditën instalime ushtarake amerikane në Kuvajt.
Përshkallëzimi vjen mes paralajmërimeve të presidentit Donald Trump për goditje të reja ndaj infrastrukturës iraniane dhe rrit shqetësimet për sigurinë në Gjirin Persik dhe tregjet globale.
