Kryeministri Edi Rama ka reaguar për denoncimin në SPAK ndaj ministrit të Financave, Petrit Malaj, nga shoqatat e magjistratëve, për bllokimin e pagave të këtyre të fundit.
Përmes një statusi në rrjetin social X, Rama deklaron se vendimi i ministrit Malaj nuk është i pavarur, por i linjëzuar e dakordësuar plotësisht me Qeverinë dhe juristët pranë saj. Nisur nga kjo, Rama ironizon duke thënë se në padinë e magjistratëve, si i kallëzuar duhej të ishte dhe emri i tij.
“Ministri i Financave është konsultuar paraprakisht me ne për qëndrimin e tij, për të cilin edhe skuadrat tona juridike kanë shprehur unanimisht qëndrimin se pushteti gjyqësor nuk mund të hapë derën e thesarit të shtetit”,- deklaron Rama.
Më tej, numri një i qeverisë thekson se zbatimi i vendimit të Gjykatës Kushtetuese për rritjen e pagave të magjistratëve duhet të kalojë përmes Parlamentit, sepse menaxhimi dhe shpenzimi i buxhetit të shtetit është kompetencë e legjislativit.
Postimi i plotë i Edi Ramës:
Kallëzimi penal i gjykatësve për Ministrin e Financave pse nuk lejon që ata të hapin derën e thesarit për rritjen e pagave të tyre, ndërkohë që ministri pret me ligj e me zakon Kuvendin e Shqipërisë që të shprehet për vendimin e Gjykatës Kushtetuese, ka vetëm një mangësi: Mungon emri im dhe ai i ministrit të drejtësisë, sepse Ministri i Financave është konsultuar paraprakisht me ne për qëndrimin e tij, për të cilin edhe skuadrat tona juridike kanë shprehur unanimisht qëndrimin se pushteti gjyqësor nuk mund të hapë derën e thesarit të shtetit. Vetëm parlamenti mund ta bëjë këtë. Kaq kisha dhe nuk dua të zgjatem me çfarë mendoj për tërë këtë historinë bajate të vetërritjes së rrogave, nga kategoria më e mirëpaguar e Republikës së Shqipërisë. Por për sa më takon asgjë nuk ndryshon, pagat do të rriten me vendim të Kuvendit të Shqipërisë dhe në respekt të plotë të vendimit të Gjykatës Kushtetuese.
