Pak orë para koncertit 4 milionë eurosh të Kanye West, kryeministri Edi Rama vendosi t'i bëjë artistit edhe një dhuratë simbolike. Në ambientet e Kryeministrisë, ai e priti reperin amerikan dhe i dorëzoi librin "The Albanian Files", botimin që prej javësh ndodhet në qendër të debatit politik dhe protestave. Një dhuratë jo rastësore, që përmbledh qindra projekte zhvillimi në Shqipëri, mes tyre edhe investime që kanë nxitur protesta, si ai në Zvërnec.
Takimi u publikua nga vetë Rama përmes një videoje në Facebook. Postimin kreu i qeverisë e shoqëroi me një këngë të Kanye West dhe me simbolin e pesë yjeve. Një detaj që shumë komentues e lexuan si një tjetër thumbim ndaj fushatës së vlerësimeve me një yll në Google Reviews, e cila gjatë protestave ka shënjestruar biznese që qytetarët i lidhin me oligarkët.
Ky takim zhvillohet në një moment kur koncerti i Kanye West vijon të shoqërohet me polemika politike. Financimi me fonde publike ka nxitur kritika të forta, ndërsa opozita ka paralajmëruar se do ta kallëzojë çështjen në SPAK.
