Kreu i Grupit Parlamentar të Partisë Demokratike, Gazment Bardhi, ka njoftuar se të hënën do të depozitojë në SPAK një kallëzim penal ndaj kryeministrit Edi Rama dhe ministrit Blendi Gonxhja për financimin me 4.2 milionë euro të koncertit të Kanye West. Përmes një postimi, Bardhi akuzon Ramën për standard të dyfishtë. Ai rikujton se kur ishte në opozitë, kryeministri i sotëm denonconte si abuzim tre aktivitete publike me vlerë rreth 1 milion euro, të organizuara për 100-vjetorin e Pavarësisë. Sipas Bardhit, 14 vite më vonë, i njëjti kryeministër ka miratuar një fond prej 4.2 milionë eurosh për një koncert privat, pa procedurë ligjore dhe duke përdorur fonde që, sipas tij, duhet të shërbejnë vetëm për fatkeqësi natyrore ose situata të jashtëzakonshme.
Demokrati kërkon që Rama të mbajë përgjegjësi penale për përdorimin e këtyre fondeve, duke e cilësuar vendimin një abuzim me paratë e taksapaguesve.
“Ditën e hënë, Grupi Parlamentar i Partisë Demokratike do të depozitojë kallëzim penal në Prokurorinë e Posaçme (SPAK) kundër Edi Ramës dhe Blendi Gonxhes, të cilët duhet të japin llogari para ligjit dhe qytetarëve për abuzimin flagrant me paratë e shqiptarëve”, shkruan Bardhi.
