Me 82 vota kundër dhe 27 pro, Kuvendi rrëzoi kërkesën e Partisë Demokratike për zgjatjen me tre muaj të mandatit të Komisionit të Posaçëm për Reformën Territoriale.
Gjatë debatit në seancë, kryetari i PD-së, Sali Berisha, akuzoi mazhorancën se po e mbyll procesin në mënyrë të njëanshme. Sipas tij, një pjesë e raporteve dhe propozimeve të paraqitura nga opozita nuk janë shqyrtuar dhe diskutuar në komision, duke e bërë të domosdoshme shtyrjen e afatit të punës së tij.
Edhe më herët, Konferenca e Kryetarëve nuk arriti një dakordësi për zgjatjen e mandatit të komisionit, duke ia lënë vendimin seancës plenare.
Pas më shumë se katër orësh diskutimesh procedurale, Kuvendi kaloi në rendin e ditës me paraqitjen e raporteve të Komisionit të Reformës Territoriale. Në atë moment, bashkëkryetari i komisionit nga opozita, Luçiano Boçi, u drejtua te foltorja për të penguar ministrin Arbjan Mazniku të prezantonte raportin e mazhorancës.
Për shkak të tensioneve në sallë, nënkryetari i Kuvendit, Niko Peleshi, ndërpreu sërish punimet dhe shpalli një pushim pesëminutësh, i treti gjatë seancës së sotme.
