Prokuroria Gjirokastër këtë të premte ka mbyllur hetimet dhe kërkon 30 vite burgim për 69-vjeçarin, Thoma Masora i cili është autori i vrasjes së çiftit të të moshuarve Kosta dhe Kleoniki Ilia të ndodhur në vitin 2024 në Dropull. Ai akuzohet për veprën penale ‘Vrasja në rrethana të tjera cilësuese’.
Çifti i të moshuarve jetonin të vetëm pasi nuk kishin fëmijë dhe policia nuk kishte konstatuar shenja të dhunimit të banesës, apo thyerje të dritareve dhe dyerve, duke bërë kështu që të ngriheshin dyshime se ishte një krim brenda familjes.
Hetimet zbuluan se autori ishte person i njohur me të moshuarit. Sipas hetimeve shkak i vrasjes ishin motivet e dobëta, mosmarrëveshje të mëparshme dhe një konflikt i çastit mes autorit të ngjarjes dhe viktimave.
“Prokuroria pranë Gjykatës së Shkallës së parë të Juridiksionit të Përgjithshëm, Gjirokastër, në përfundim të hetimeve dhe shqyrtimit gjyqësor kërkon 30 vite burg për shtetasin Th. M. i akuzuar për veprën penale ‘Vrasja në rrethana të tjera cilësuese’ parashikuar nga neni 79/dh i Kodit Penal.
Hetimet mbi procedimin penal nr.240, të vitit 2024, arritën në përfundimin se i pandehuri Th.M., është fajtor dhe Prokuroria pranë Gjykatës së Shkallës së Parë të Juridiksionit të Përgjithshëm Gjirokastër në paraqitjen e diskutimit përfundimtar kërkon dënimin e tij me 30 vite burgim për vrasjen e çiftit të të moshuarve K.I. dhe K.I., në fshatin Bodrishtë, Dropull.
Në vijim, Prokuroria pranë Gjykatës së Shkallës së Parë Juridiksionit të Përgjithshëm Gjirokastër, shpreh angazhimin e plotë për hetimin dhe vënien para përgjegjësisë ligjore të personave që kryejnë vepra penale kundër jetës dhe shëndetit”, njofton Prokuroria.
