Partia Demokratike do të mbledh këtë të shtunë në orën 10 Kuvendin Kombëtar zgjedhor, në të cilin pritet të vendoset për disa çështje që ndikojnë në të ardhmen e kësaj partie për 3 vitet e ardhshme.
Kuvendi do të vendosë për ndryshimet e statutit që u miratuan nga Kryesia 3 ditë më parë dhe do të zgjedhë Këshillin e ri Kombëtar, duke i hapur rrugën edhe ndryshimeve të tjera në kupolën e partisë.
Burime për Euronews Albania bëjnë me dije se ky Kuvend do të quhet si Kuvendi i ripërtëritjes së partisë dhe një qasje e tillë vjen gati 4 vite pas Kuvendit të famshëm të Rithemelimit që Berisha thirri në 11 dhjetorin e 2021-it.
Punimet e Komisionit pritet të drejtohen nga Ivi Kaso, ndërkohë që ndryshimet në statut do të prezantohen nga Gazment Bardhi. Sakaq ndryshimet në riorganizimin e diasporës dhe digjitalizimin e partisë do të prezantohen nga Nikola Kedhi dhe Grigels Muçollari.
Ndërkohë mësohet se fjala hapëse do t’i besohet të resë që vjen nga diaspora Erisa Bajaziti. Punimet e Kuvendit më pas do të vijojnë me fjalën e Berishës dhe procesin e votimit për anëtarët e rinj të Këshillit Kombëtar.
