Organizatorët e Zamna Tirana e nisën 16 majin me një plan. E mbaruan me një legjendë.
Shiu i rëndë prishi gjithçka pak orë para eventit. Lokacioni fillestar u braktis. Dhe zgjidhja e fundit minutës, Pallati i Kongreseve, u kthye në surprizën më të madhe të natës. Jo sepse ishte i madh. Por sepse nuk e kishte bërë kurrë këtë: për herë të parë, hapësirat e tij prisnin rave.
Brenda, 5-6 mijë njerëz. Dritëra, vizualë, muzikë elektronike që rritej gradualisht, Argia, Øostil, Miss Monique dhe ARTBAT si finale. Secili solli diçka tjetër. Bashkë bënë një natë që nuk ndahej lehtë në seksione, sepse energjia ishte e vazhdueshme nga fillimi deri në fund.
Zona e IQOS, partner global i Zamna, ishte ndër hapësirat më aktive të mbrëmjes. E menduar si vendtakim dhe jo thjesht si korridor brandi, ajo kombinonte lojëra si buzzwire challenge, jenga dhe ring game me mundësi fitoreje merchandise. Njerëzit ndalonin, luanin, qeshnin dhe riktheheshin në pistë. Ajo lloj hapësire që nuk e planifikon të qëndrosh, por qëndron.
Zamna ka shumë qytete në hartën e saj. Tirana tani është njëra prej tyre, jo si destinacion emergjent, por si pjesë e komunitetit. Dhe 16 maji tregoi pse.
