Gjykata e Posaçme Kundër Korrupsionit dhe Krimit të Organizuar ka kthyer për plotësim hetimesh dosjen ndaj ish-kreut të Komisionit të Prokurimit Publik, Jonaid Myzyri, për të cilin SPAK kishte kërkuar pushimin e çështjes lidhur me një tender me vlerë 2.2 milionë euro.
Gjykata i ka lënë 45 ditë kohë Struktura e Posaçme Kundër Korrupsionit dhe Krimit të Organizuar për të kryer veprime shtesë hetimore, mes tyre edhe një akt-ekspertim.
Myzyri u mor i pandehur për veprën penale “shkelje e barazisë në tendera”, por pas rreth një viti hetimesh, prokurori Elvin Gokaj kërkoi pushimin e çështjes me argumentin se nga verifikimet nuk rezulton që ai të ketë kryer vepër penale.
Përveç Myzyrit, SPAK ka kërkuar pushimin e hetimeve edhe për anëtarët e Komisionit të Prokurimit Publik Vilma Zhupaj, Lindita Skeja, Merita Zeqaj dhe Enkelejda Bega.
SPAK e mori të pandehur Myzyrin në qershor 2025 për një tender të zhvilluar nga Autoriteti Rrugor Shqiptar në shtator 2020, me vlerë rreth 2.2 milionë euro, për mirëmbajtjen e segmentit rrugor Rrëshen–Shpal, Shpal–Qafë Bene–Hadroj dhe Shpal–Ura e Repsit.
Sipas SPAK, gjatë procedurës janë konstatuar shkelje ligjore, të cilat Komisioni i Prokurimit Publik, i drejtuar në atë kohë nga Myzyri, i ka shpërfillur, duke favorizuar bashkimin e kompanive AEK Munella dhe Drini-1, që fituan tenderin me dokumente të falsifikuara.
