Një ditë pas takimit me ministrat dhe drejtuesit politikë të PS-së, sot Edi Rama do të mbledhë në takim asamblenë e socialistëve të Tiranës. Takimi vjen një ditë pasi Veliaj shkarkoi nënkryetaren e bashkisë, Anuela Ristani.
Lapsi.al mëson se socialistët e Tiranës do të mblidhen në një prej restoranteve të njohur në zonën e Lundrës, në periferinë lindore të kryeqytetit në orën 11:00. Në fokus të diskutimit me deputetët e Tiranës do jenë “Besa” dhe “Pasqyr Albania”.
Këtë të fundit Rama tha se do ta shndërrojë në ligj, njësoj sic shndërroi në ligj edhe Bashkëqeverisjen dhe në finale nuk zgjidhi asgjë.
Me siguri përgjatë takimit do të diskutohet edhe situata e fundit e krijuar në Bashkinë Tiranë pas vendimit të djeshëm të Erion Veliajt. Kandidatura e Ogerta Manastirliut për Tiranën duket se ka rënë për socialistët, sidomos pas protestës dhe dinamikave të reja politike brenda PS-së.
Ndërkohë Erion Brace nga ana tjetër ka nisur një vetëofrim për Tiranën ndonëse nominimi i tij duket gjithashtu shumë i largët. ©LAPSI.al
