Nga Sven Christian Schulz, RND
Ende mijëra njerëz protestojnë në Shqipëri përpara selisë së kryeministrit Edi Rama kundër korrupsionit të rrënjosur thellë, “shitjes së vendit” investitorëve të huaj dhe një establishmenti që beson se ligjet mund të ndryshohen me para.
Shkak për protestat është një projekt gjigant ndërtimi me marinë jahtesh dhe kompleks hotelerie në një zonë të mbrojtur natyrore, ku flamingot, pelikanët dhe kafshë të tjera shumohen dhe pushojnë.
Shqipëria duhet të vendosë: një resort luksoz prej 1,4 miliardë eurosh me 10.000 shtretër për dhëndrin e Donald Trump, Jared Kushner, në një nga deltat e fundit të paprekura të lumenjve në Mesdhe – apo anëtarësimin në BE.
Rama i dëshiron të dyja.
Brukseli do të bënte mirë ta bënte të qartë dhe pa ekuivok: mbrojtja e natyrës dhe shteti i së drejtës në fund vlejnë më shumë se çdo kompleks hotelerie për elitën ndërkombëtare të luksit.
Kush shkatërron lagunën e flamingove, shkatërron gjithashtu rrugën e Shqipërisë drejt BE-së.
Është e papranueshme që qeveria e një vendi kandidat për anëtarësim në BE të ndryshojë në mënyrë të qëllimshme ligjet në favor të investitorëve të mëdhenj.
Aq më tepër kur krijohet përshtypja se korrupsioni nuk po luftohet, por ndoshta po favorizohet.
Protestat e flamingove janë një provë e trefishtë për rrugën e Shqipërisë drejt BE-së.
Rama duhet t’i rezistojë joshjes së miliardave.
Ndryshimet në legjislacionin për mbrojtjen e natyrës duhet të tërhiqen, dhe ligji duhet të bëhet përsëri në përputhje me standardet e BE-së.
Dhe mënyra se si trajtohen demonstruesit do të tregojë nëse Shqipëria është e pjekur nga pikëpamja e shtetit të së drejtës për t’u anëtarësuar në BE.
Prej kohësh nuk bëhet më fjalë vetëm për disa flamingo.
Bëhet fjalë për pakënaqësinë e madhe ndaj qeverisë, stilit të autoritar të drejtimit dhe vendimeve në favor të një elite të vogël.
Shumë të rinj shqiptarë tashmë duan të largohen nga vendi.
Ajo që Rama do të vendosë në lagunë do të formësojë të ardhmen e vendit: luks për pak veta apo një e ardhme në BE për të gjithë.
