Pas përfundimit të fjalimeve para godinës së Kryeministrisë, protestuesit kanë nisur marshimin në rrugët e Tiranës. Me flamuj kombëtarë dhe thirrje si "Shqipëria e shqiptarëve, vdekje tradhtarëve", qytetarët u larguan nga bulevardi "Dëshmorët e Kombit", duke përsëritur se nuk do ta ndalin protestën deri në dorëheqjen e kryeministrit dhe largimin e klasës aktuale politike.
Gjatë tubimit, një pjesë e madhe e fjalimeve u përqendrua te financimi me mbi 4 milionë euro i koncertit të Kanye West, që mbahet mbrëmjen e sotme në Tiranë. Protestuesit e cilësuan vendimin të pajustifikuar, duke argumentuar se këto para duhej të ishin investuar në sektorë me nevoja urgjente. Një fermer akuzoi qeverinë se ka lënë pa dëmshpërblim bujqit e prekur nga përmbytjet, ndërsa ka financuar koncertin e artistit amerikan.
"Fermerët i ka shpallur armiq të vendit. Në vend që të dëmshpërblejë fermerët e përmbytur, shkon i jep 4 milionë euro një këngëtari që nuk i hyn njeriu në punë," u shpreh ai.
Një tjetër protestues u bëri thirrje intelektualëve t'i bashkohen lëvizjes, duke theksuar se mbështetja nga distanca nuk mjafton.
"Kjo lëvizje ka nevojë për intelektualë. Mbështetja juaj me shkrim është e vyer, por nuk mjafton. Egoja nuk duhet të bëhet pengesë për bashkimin tonë," u shpreh ai.
Në podium foli edhe aktori Mehdi Malkaj, i cili akuzoi kryeministrin se nuk ka mbajtur premtimet për shëndetësinë, arsimin dhe mirëqenien e qytetarëve. Ish-kandidati i PD-së, Ethem Aga, e cilësoi shpopullimin si një nga problemet më të rënda të vendit, duke theksuar se miliona shqiptarë jetojnë tashmë në emigracion.
