Kuvendi mblidhet këtë të enjte në seancën e fundit plenare për këtë sesion parlamentar. Jashtë godinës pritet të zhvillohet protesta e radhës. Organizatorët kanë thirrur qytetarët të mblidhen në orën 08:30 në sheshin "Skënderbej" dhe më pas të marshojnë drejt Parlamentit. Protestuesit kanë paralajmëruar se do t'u "urojnë pushime të mbara" deputetëve, duke e kthyer seancën e fundit në një tjetër ditë mobilizimi kundër qeverisë.
Në rendin e ditës janë raportimet e shtatë institucioneve kushtetuese: KLGJ, KLP, KLSH, Prokurori i Përgjithshëm, SPAK, Avokati i Popullit dhe Inspektori i Lartë i Drejtësisë. Këto raportime ishin shtyrë më herët për shkak të tensioneve në sallën e Kuvendit. Deputetët do të shqyrtojnë gjithashtu projektligjin për turizmin, i cili parashikon heqjen e gardheve që pengojnë hyrjen në plazhe dhe ndalimin e punimeve ndërtimore gjatë sezonit turistik.
Në seancë janë parashikuar edhe një interpelancë me ministrin e Infrastrukturës dhe Energjisë, Enea Karakaçi, për vonesat në ndërtimin e bypass-it të Elbasanit, si dhe dy seanca pyetje-përgjigje për çështje që lidhen me pronat në Gramsh dhe memorandumin Shqipëri-Greqi për gazin natyror të lëngshëm.
