Bjellorusia, që Shqipëria do të ketë përballë në nisjen e Nations League, mund të jetë një skuadër pa emra të mëdhenj në futbollin europian, por vjen në këtë përballje me një seri prej gjashtë ndeshjesh pa humbje. Po cili është kundërshtari me të cilin Shqipëria do të përballet në ndeshjen e parë në Nations League? Pas humbjes 2-1 ndaj Skocisë në tetor të vitit të kaluar, bjellorusët nuk kanë humbur më në gjashtë ndeshje radhazi. Në drejtimin e Viktor Goncharenkos, skuadra ka fituar tre prej këtyre takimeve, ndryshe nga kuqezinjtë që vijnë nga pesë humbje radhazi..
Nuk është rastësi në fakt, sepse pasi e mbyllën në vendin e fundit fushatën e tyre kualifikuese në Botëror, situata ka ndryshuar që pas janarit 2026, kur u emërua trajner Viktor Goncharenko. 49-vjeçari në 4 ndeshje në krye të kësaj kombëtareje ka marrë 3 fitore dhe 1 barazim, duke rikthye optimizmin që mungonte prej kohësh. Kjo do të thotë se në 2026 Bjellorusia nuk njeh humbje, edhe pse ecuria pozitivi nisi më herët, që pas humbjes 2-1 ndaj Skocisë më 12 tetor të vitit të kaluar. Më pas erdhi barazimi 2-2 me Danimarkën dhe 0-0 me Greqinë në eliminatoret e Botërorit, përpara se Bjellorusia të fitonte tre ndeshje radhazi: 1-0 ndaj Qipros, 2-1 ndaj Armenisë dhe 4-1 ndaj Sirisë. Seria u mbyll përkohësisht me barazimin 2-2 ndaj Burkina Fasos në qershor.
Goncharenko ka përzgjedhur një grup me disa futbollistë që luajnë jashtë vendit ku spikat portieri Fedor Lapoukhov, pjesë e CSKA Sofjes, ndërsa në mesfushë një rol të rëndësishëm pritet të ketë Maks Ebong, gjithashtu te klubi bullgar. Evgeni Yablonski i Asteras Tripolis dhe sulmuesi Vitali Lisakovich i Tobolit janë dy të tjerë me eksperiencë ndërkombëtare. Në repartin ofensiv, vëmendje meritojnë edhe German Barkovski i Polonias së Varshavës, por frikësuesi i vërtetë është Trofim Melnichenko i Portos. Bjellorusia vjen pra me moral të lartë dhe me një seri që tregon se nuk është një kundërshtar për t’u nënvlerësuar. Shqipëria do të ketë përballë një skuadër që prej gjashtë ndeshjesh nuk njeh humbjen.
