Partia Demokratike e Kosovës ka vijuar protestat para Qeverisë, duke kërkuar që Albin Kurti të shkojë në Kuvend dhe të rinisë procesi për konstituimin e institucioneve. Në tubimin e sotëm, deputetëve të PDK-së iu bashkuan asamblistë, drejtorë dhe aktivistë nga Mitrovica. Të pranishëm ishin edhe deputetë të Aleancës.
Prej disa ditësh, përfaqësuesit e PDK-së qëndrojnë për orë të tëra para hyrjes së Qeverisë. Ata kundërshtojnë vijimin e ushtrimit të detyrës nga Kurti në këtë formë dhe kërkojnë funksionalizimin sa më shpejt të institucioneve. PDK e cilëson situatën si ngërç institucional dhe paralajmëron se protestat do të vijojnë edhe në ditët në vazhdim.
