Protesta qytetare që mbahet në qendër të Tiranës shënoi këtë të hënë të 7 shtatorit ditën e saj të 100-të të revoltës qytetare kundër klasës politike. Si çdo ditë, qytetarët nisën grumbullimin në sheshin “Skënderbej” për të vazhduar më tej marshimin drejt godinës së Kryeministrisë ku mbajtën fjalime nga organizatorët e protestës dhe protestuesit.
Kërkesa e protestuesve mbetet dorëheqja e panegociueshme e kryeministrit të vendit Edi Rama si dhe anulimi i ligjit për zonat e mbrojtura.
Në protestën e 100-të, spikati rikthimi i një prej protestueseve më të veçanta, e cila bëri bujë me parullat e saj. Ajo u shpreh se ka marrë vendimin më të mirë për t’u rikthyer dhe se parullat e saj, pavarësisht se disave nuk u pëlqejnë, do vazhdojë të bëjë të tilla.
“Ju keni më dhënë jetë dhe shpresë, ju më keni ripërtërirë përsëri. Vërtet, kur erdha në protesta, e pashë që më kishin pritur. Ne nuk na largon askush nga protesta. Kjo lloj proteste, grupi im i komitetit për mbrojtjen e popullit që u arrestua në 89-tën, kërkonte një protestë të tillë dhe ajo u realizua pas kaq shumë vitesh. Vitet nuk kanë rëndësi, unë nuk plakem. Unë isha e lodhur, e stresuar dhe e shantzhuar. Unë kam pasur parulla që disa nuk kanë qejf t’i shikojnë”, -tha ajo.
Një tjetër protestues ka shprehur mirënjohjen ndaj çdokujt që doli në shesh për të bërë opozitën në një periudhe kur ajo ishte inekzistente dhe qeveria po e shiste vendin. Ai shprehu bindjen se do të arrihet objektivi i kësaj nisme, pra rrëzimi i sistemit.
"Atdheu është në rrezik dhe ju dolët për ta mbrojtur. Dolën në një kohë kur nuk kishte për ta mbrojtur, qeveria po e shiste, opozita ishte inekzistence. Dolët ju për të bërë opozitën. Mirënjohje që dolët në këtë shesh për 100 ditë. Jemi me entuziazëm që të arrijmë objektivin kryesor, rrëzimin e kësaj qeverie dhe krijimin e një qeverie teknike që të marrë në dorë fatet e kombit tonë”, tha protestuesi.
Në ditën e 100-të të protestës nuk kanë munguar as pankartat pikante të përgatitura nga protestuesit të cilët shprehen se do të vazhdojnë të protestojnë. Mes pankartave të shfaqura gjatë tubimit janë: “Një shesh, mijëra zëra”; “SPAK-u fle gjumë dhe nuk bën arrestime, këto vezë mbi Parlament janë për këto dënime”; “100 ditë prani besnike, Shqipëria digjet, politika krihet”. ©LAPSI.al
